-ಡಾ. ರಮೇಶ್ ನಿಂಬೆಮರದಳ್ಳಿ, ಪರ್ತಕತ್ರ, ಲೇಖಕ, ಎಐ ತಜ್ಞ
ಮನುಷ್ಯನ ಕಲ್ಪನೆ ಮತ್ತು ತಂತ್ರಜ್ಞಾನದ ನಡುವಿನ ಅಂತರ ದಿನದಿಂದ ದಿನಕ್ಕೆ ಕಡಿಮೆಯಾಗುತ್ತಲೇ ಹೋಗುತ್ತಿದೆ. ಮೊನ್ನೆ ಮೊನ್ನೆಯಷ್ಟೇ ಕೃತಕ ಬುದ್ಧಿಮತ್ತೆ ಎಂದರೆ ನಮ್ಮ ಪ್ರಶ್ನೆಗಳಿಗೆ ಪಟಪಟನೆ ಉತ್ತರಿಸುವ, ಪ್ರಬಂಧ ಬರೆದುಕೊಡುವ ಅಥವಾ ಕವನ ಕಟ್ಟಿ ನಿಬ್ಬೆರಗಾಗಿಸುವ ಒಂದು ಚಾಟ್ಬಾಟ್ ಅಷ್ಟೇ ಎಂದುಕೊಂಡಿದ್ದೆವು. ಆದರೆ, ಇದೀಗ ಓಪನ್ಎಐ ಜಗತ್ತಿನೆದುರು ತೆರೆದಿಟ್ಟಿರುವ ಹೊಸ ಅವತಾರ ‘ಜಿಪಿಟಿ-6 ಆಸ್ಟ್ರಾ’ ಈ ಪರಿಕಲ್ಪನೆಯನ್ನೇ ಬುಡಮೇಲು ಮಾಡಿದೆ.
ಕಂಪ್ಯೂಟರ್ ಪರದೆಯ ಮೇಲೆ ಕೇವಲ ಅಕ್ಷರಗಳ ಆಟವಾಡುತ್ತಿದ್ದ ಕೃತಕ ಬುದ್ಧಿಮತ್ತೆ, ಇದೀಗ ತಾನೇ ಸ್ವತಃ ಕಂಪ್ಯೂಟರ್ನ ಮೌಸ್-ಕೀಬೋರ್ಡ್ ಹಿಡಿದು ಕಚೇರಿಯ ಎಲ್ಲ ಕೆಲಸಗಳನ್ನೂ ನಿಭಾಯಿಸಲು ಹೊರಟರೆ ಹೇಗಿರಬಹುದು? ‘ಆಸ್ಟ್ರಾ’ ಮಾಡುತ್ತಿರುವುದು ಅದನ್ನೇ! ಈ ಮಹಾಜಿಗಿತವನ್ನು ಕಂಡ ತಂತ್ರಜ್ಞಾನ ಜಗತ್ತು, “ಇದು ಮನುಷ್ಯನ ಸಮಗ್ರ ಬುದ್ಧಿಮತ್ತೆಗೆ ಸರಿಸಾಟಿಯಾಗಬಲ್ಲ ಎಜಿಐ (ಆರ್ಟಿಫಿಷಿಯಲ್ ಜನರಲ್ ಇಂಟೆಲಿಜೆನ್ಸ್) ಯುಗದ ಮೊದಲ ಹೆಜ್ಜೆ” ಎಂದು ಅಭಿಪ್ರಾಯಪಡುತ್ತಿದೆ. ಹಾಗಾದರೆ, ಈ ಹೊಸ ಮಾಡೆಲ್ನಲ್ಲಿ ಅಂಥ ವಿಶೇಷವೇನಿದೆ? ಸಾಮಾನ್ಯ ಮನುಷ್ಯನ ದಿನನಿತ್ಯದ ಬದುಕಿನ ಮೇಲೆ ಇದು ಬೀರಲಿರುವ ಪರಿಣಾಮವೇನು?
ಇದು ‘ಆಪರೇಟರ್’ ಮಾಡೆಲ್!
ಹಿಂದಿನ ಜಿಪಿಟಿ ಮಾದರಿಗಳಿಗೂ ‘ಆಸ್ಟ್ರಾ’ಗೂ ಇರುವ ಅತಿಮುಖ್ಯ ವ್ಯತ್ಯಾಸವೆಂದರೆ, ಹಿಂದಿನವು ಕೇವಲ ‘ಮಾತನಾಡುತ್ತಿದ್ದವು’, ಆದರೆ ಆಸ್ಟ್ರಾ ‘ಕೆಲಸ ಮಾಡುತ್ತದೆ’.
ಸಾಮಾನ್ಯವಾಗಿ ನಾವು ಕಂಪ್ಯೂಟರ್ನಲ್ಲಿ ಮಾಡುವ ಕೆಲಸಗಳೇನು? ಹತ್ತಾರು ಸಾಫ್ಟ್ವೇರ್ಗಳನ್ನು ರನ್ ಮಾಡುವುದು, ವೆಬ್ಸೈಟ್ಗಳನ್ನು ತೆರೆಯುವುದು, ಸ್ಪ್ರೆಡ್ಶೀಟ್ನಲ್ಲಿ ಲೆಕ್ಕ ಹಾಕುವುದು, ಕಡತಗಳನ್ನು ರಚಿಸುವುದು ಇಲ್ಲವೇ ಸರಿಪಡಿಸುವುದು, ಪ್ರೆಸೆಂಟೇಷನ್ ತಯಾರಿಸಿ ಇಮೇಲ್ ಕಳುಹಿಸುವುದು... ಈ ಎಲ್ಲ ಕಚೇರಿ ಕೆಲಸಗಳನ್ನು ಆಸ್ಟ್ರಾ ಒಬ್ಬ ನುರಿತ ಸಹಾಯಕರಂತೆ ತಾನೇ ಪರದೆಯನ್ನು ನೋಡಿ, ಬಟನ್ಗಳನ್ನು ಕ್ಲಿಕ್ ಮಾಡಿ, ದೋಷಗಳನ್ನು ಸರಿಪಡಿಸಿ ಪೂರ್ಣಗೊಳಿಸುತ್ತದೆ. ನಾವೊಂದು ಕೆಲಸ ಹೇಳಿ ಕಾಫಿ ಕುಡಿಯಲು ಹೋಗಿ ಬರುವಷ್ಟರಲ್ಲಿ, ಕಂಪ್ಯೂಟರ್ನ ಎಲ್ಲ ವಿಂಡೋಗಳನ್ನು ತಾನೇ ನಿರ್ವಹಿಸಿ ಕೆಲಸವನ್ನು ಅಚ್ಚುಕಟ್ಟಾಗಿ ಸಿದ್ಧಪಡಿಸಿಡುವ ಮಟ್ಟಿಗೆ ಇದು ಪ್ರಬುದ್ಧವಾಗಿದೆ.
ಬೆರಗು ಹುಟ್ಟಿಸುವ ಸಾಮರ್ಥ್ಯಗಳು
1. 3D ಪ್ರಪಂಚದ ಹೊಸ ಮಾಯಾಲೋಕ
ಇದುವರೆಗೆ ಎಐ ಕೇವಲ ಫೋಟೋ ಅಥವಾ ವೀಡಿಯೊಗಳನ್ನು ಸೃಷ್ಟಿಸುತ್ತಿತ್ತು. ಆದರೆ ಆಸ್ಟ್ರಾ ಒಂದು ಹೆಜ್ಜೆ ಮುಂದೆ ಹೋಗಿ, ವಾಸ್ತುಶಿಲ್ಪ ಹಾಗೂ 3D ಮಾದರಿಗಳನ್ನು ಕ್ಷಣಾರ್ಧದಲ್ಲಿ ರೂಪಿಸುತ್ತದೆ. ಉದಾಹರಣೆಗೆ, ನಿಮ್ಮ ಮನೆಯ ನಕ್ಷೆ ಅಥವಾ ಫೋಟೋವನ್ನು ತೋರಿಸಿ ‘ಇದರ 3D ಮಾದರಿ ಸಿದ್ಧಪಡಿಸು’ ಎಂದರೆ, ಆಸ್ಟ್ರಾ ಬ್ಲೆಂಡರ್ ಸಾಫ್ಟ್ವೇರ್ ಬಳಸಿ ಮನೆಯನ್ನು ವಿನ್ಯಾಸಗೊಳಿಸುತ್ತದೆ. ಅಷ್ಟೇ ಅಲ್ಲ, ಕಂಪ್ಯೂಟರ್ ಗೇಮ್ಗಳಲ್ಲಿ ನಾವು ಒಳಗೆ ನಡೆದಾಡುವಂತೆ ನೋಡುವ ಹಾಗೆ ಒಂದು ಸುಂದರ ವರ್ಚುವಲ್ ಪ್ರಪಂಚವನ್ನೇ ಕಟ್ಟಿಬಿಡುತ್ತದೆ! ಗೇಮಿಂಗ್, ಚಲನಚಿತ್ರ ಮತ್ತು ವಾಸ್ತುಶಿಲ್ಪ ರಂಗದಲ್ಲಿ ಇದು ಕ್ರಾಂತಿಯನ್ನೇ ಸೃಷ್ಟಿಸಲಿದೆ.
2. ಸೈಬರ್ ಲೋಕದ ಕಾವಲುಗಾರ... ಹಾಗೆಯೇ ಚಾಲೆಂಜರ್!
ಇಂಟರ್ನೆಟ್ ಜಗತ್ತಿನ ಸುರಕ್ಷತೆಗೆ ಸಂಬಂಧಿಸಿದಂತೆ ಆಸ್ಟ್ರಾ ಅಸಾಧಾರಣ ಬುದ್ಧಿಮತ್ತೆ ತೋರಿದೆ. ಯಾವುದೇ ಅತ್ಯಂತ ಭದ್ರವಾದ ಸರ್ವರ್ ಅಥವಾ ವೆಬ್ಸೈಟ್ನಲ್ಲಿ ಅಡಗಿರುವ ತಾಂತ್ರಿಕ ಲೋಪಗಳನ್ನು ಮನುಷ್ಯನಿಗಿಂತ ಮುಂಚಿತವಾಗಿ ಇದು ಪತ್ತೆಹಚ್ಚಬಲ್ಲದು. ರಕ್ಷಣಾ ದೃಷ್ಟಿಯಿಂದ ಇದು ಸೈಬರ್ ಸೆಕ್ಯುರಿಟಿ ಕ್ಷೇತ್ರಕ್ಕೆ ವರದಾನ ನಿಜ; ಆದರೆ ತಪ್ಪುದಾರಿಗೆ ಇಳಿದರೆ ಡೇಟಾ ಹ್ಯಾಕಿಂಗ್ನಂತಹ ಅಪಾಯಗಳೂ ಎದುರಾಗಬಹುದು ಎಂಬ ಕಾರಣಕ್ಕೆ, ಓಪನ್ಎಐ ಸಂಸ್ಥೆ ಸದ್ಯಕ್ಕೆ ಇದನ್ನು ಕಟ್ಟುನಿಟ್ಟಾದ ನಿಯಮಗಳ ಅಡಿಯಲ್ಲಿ ಪರಿಶೀಲಿಸುತ್ತಿದೆ.
3. ವಿಜ್ಞಾನ ಮತ್ತು ಗಣಿತದಲ್ಲಿ ಸಂಶೋಧಕನಿಗೆ ಜೊತೆಗಾರ
ಶಾಲಾ-ಕಾಲೇಜುಗಳ ಗಣಿತದ ಲೆಕ್ಕ ಬಿಡಿಸುವುದು ಎಐಗೆ ಹಳೆಯ ವಿಷಯ. ಆದರೆ, ಜಗತ್ತಿನ ಶ್ರೇಷ್ಠ ವಿಜ್ಞಾನಿಗಳು ಮತ್ತು ಗಣಿತಜ್ಞರು ವರ್ಷಗಳಿಂದ ಬಿಡಿಸಲಾಗದೆ ಹೆಣಗಾಡುತ್ತಿದ್ದ ಹಲವು ಸಂಕೀರ್ಣ ಸಿದ್ಧಾಂತಗಳನ್ನು ವಿಶ್ಲೇಷಿಸಲು ಹಾಗೂ ಹೊಸ ಸಾಧ್ಯತೆಗಳನ್ನು ತೋರಿಸಲು ಆಸ್ಟ್ರಾ ನೆರವಾಗಿದೆ. ಜೀವವಿಜ್ಞಾನ ಮತ್ತು ಔಷಧ ಸಂಶೋಧನೆಯಲ್ಲಿ ಪ್ರಯೋಗಾಲಯದ ಅಪಾರ ಡೇಟಾವನ್ನು ವಿಶ್ಲೇಷಿಸಿ, ಹೊಸ ಔಷಧಗಳ ಆವಿಷ್ಕಾರದ ವೇಗವನ್ನು ಹೆಚ್ಚಿಸುವ ಶಕ್ತಿ ಇದಕ್ಕಿದೆ.
ಎಐ ಕುರಿತು ಇನ್ನಷ್ಟು ಆಳವಾಗಿ ತಿಳಿಯುವ ಆಸಕ್ತಿ ಇದ್ದರೆ, ಎಐ ಮಾಡೆಲ್ಗಳನ್ನು ಹೇಗೆ ಬಳಸಬೇಕೆಂದು ಕಲಿಯಲು ಬಯಸಿದರೆ, ಕೃತಕ ಬುದ್ಧಿಮತ್ತೆಯನ್ನು ಸಮಗ್ರವಾಗಿ ಮತ್ತು ಸರಳವಾಗಿ ಕಟ್ಟಿಕೊಡುವ ‘ಎಐ-ಮನುಕುಲದ ಮಹಾಯಾನ’ ಕೃತಿಯನ್ನು ಪ್ರೀ-ಆರ್ಡರ್ ಮಾಡಲು ಕ್ಯುಆರ್ ಸ್ಕ್ಯಾನ್ ಮಾಡಿ.
ಇದು ನಿಜವಾಗಿಯೂ ಎಜಿಐ (AGI) ಆರಂಭವೇ?
ಆಸ್ಟ್ರಾ ಬಿಡುಗಡೆಯೊಂದಿಗೆ ಈಗ ಎಲ್ಲರೂ ಕೇಳುತ್ತಿರುವ ಪ್ರಶ್ನೆ ‘ಇದು ಎಜಿಐನ ಆರಂಭವೇ?’ ‘ಎಜಿಐ’ ಎಂದರೆ, ಮನುಷ್ಯನು ಮಾಡಬಹುದಾದ ಯಾವುದೇ ಬೌದ್ಧಿಕ ಕೆಲಸವನ್ನು ಸ್ವತಂತ್ರವಾಗಿ, ತನ್ನದೇ ವಿವೇಚನೆಯಿಂದ ಅಷ್ಟೇ ಸಮರ್ಥವಾಗಿ ಮಾಡಬಲ್ಲ ಯಂತ್ರಬುದ್ಧಿ. ಆಸ್ಟ್ರಾ ಬಿಡುಗಡೆಯಾಗಿರುವುದನ್ನು ಗಮನಿಸಿದರೆ, ಇದು ಪೂರ್ಣ ಪ್ರಮಾಣದ ಎಜಿಐ ಖಂಡಿತ ಅಲ್ಲ. ಇದಕ್ಕೆ ಮನುಷ್ಯನಂತೆ ಸ್ವಂತ ಭಾವನೆಗಳಾಗಲಿ, ತಾನಾಗಿಯೇ ಯೋಚಿಸುವ ಇಚ್ಛಾಶಕ್ತಿಯಾಗಲಿ ಇಲ್ಲ. ಆದರೆ, ಎಜಿಐ ಕೇವಲ ಸೈನ್ಸ್-ಫಿಕ್ಷನ್ ಸಿನೆಮಾಗಳ ಕಲ್ಪನೆಯಲ್ಲ, ಅದು ಕಣ್ಣೆದುರಿಗೆ ಸಾಕಾರಗೊಳ್ಳುತ್ತಿರುವ ವಾಸ್ತವ ಎಂಬುದನ್ನು ಆಸ್ಟ್ರಾ ನಿರೂಪಿಸಿದೆ.
ಹಿಂದಿನ ಎಐಗಳು ಕೇವಲ ಒಂದು ನಿರ್ದಿಷ್ಟ ಕೆಲಸಕ್ಕೆ ಸೀಮಿತವಾಗಿದ್ದವು. ಆದರೆ ಆಸ್ಟ್ರಾ ಒಂದೇ ಸಮಯದಲ್ಲಿ ಕೋಡಿಂಗ್ ಮಾಡುತ್ತದೆ, 3D ಮನೆ ಕಟ್ಟುತ್ತದೆ, ಕಚೇರಿಯ ಕಡತ ವಿಲೇವಾರಿ ಮಾಡುತ್ತದೆ, ಗಣಿತದ ಸೂತ್ರ ಬಿಡಿಸುತ್ತದೆ ಮತ್ತು ಇಡೀ ಕಂಪ್ಯೂಟರ್ ಅನ್ನೇ ನಿಯಂತ್ರಿಸುತ್ತದೆ. ಅಂದರೆ, ಕೃತಕ ಬುದ್ಧಿಮತ್ತೆ ಹಲವು ಕ್ಷೇತ್ರಗಳಲ್ಲಿ ಏಕಕಾಲಕ್ಕೆ ಮನುಷ್ಯನಂತೆ ಬಹುಮುಖ ಪ್ರತಿಭೆ ತೋರಲು ಆರಂಭಿಸಿದೆ. ಆ ಅರ್ಥದಲ್ಲಿ, ಇದು ಖಂಡಿತವಾಗಿಯೂ “ಎಜಿಐ ಮುನ್ನುಡಿ” ಎನ್ನಬಹುದು.
ಪ್ರತಿಯೊಂದು ಹೊಸ ತಾಂತ್ರಿಕ ಕ್ರಾಂತಿಯೂ ಮನುಷ್ಯನಿಗೆ ಹೊಸ ಸವಾಲು ಮತ್ತು ಅಪಾರ ಅವಕಾಶಗಳನ್ನು ಒಟ್ಟಿಗೇ ತರುತ್ತದೆ. ಚಕ್ರದ ಆವಿಷ್ಕಾರ, ಕಂಪ್ಯೂಟರ್ನ ಆಗಮನ ಮತ್ತು ಇಂಟರ್ನೆಟ್ ಕ್ರಾಂತಿಯ ನಂತರ, ಮಾನವ ಇತಿಹಾಸದಲ್ಲೇ ಅತ್ಯಂತ ರೋಚಕವಾದ ಘಟ್ಟಕ್ಕೆ ನಾವಿಂದು ಬಂದು ನಿಂತಿದ್ದೇವೆ.
ಜಿಪಿಟಿ-6 ಆಸ್ಟ್ರಾ ಮನುಷ್ಯನಿಗೆ ಪರ್ಯಾಯವಲ್ಲ; ಬದಲಿಗೆ ಮನುಷ್ಯನ ಸಾಮರ್ಥ್ಯವನ್ನು ನೂರುಪಟ್ಟು ಹೆಚ್ಚಿಸಬಲ್ಲ ಅದ್ಭುತ ಸಹಯೋಗಿ. ಯಂತ್ರವೊಂದು ನಮ್ಮ ಸೃಜನಶೀಲತೆಗೆ ಜೊತೆಯಾಗಿ ನಿಲ್ಲುವ ಈ ‘ಬುದ್ಧಿಮತ್ತೆಯ ಮಹಾಯಾನ’ದಲ್ಲಿ ನಾವು ಹೇಗೆ ಹೆಜ್ಜೆ ಇಡಲಿದ್ದೇವೆ ಎನ್ನುವುದರ ಮೇಲೆ ನಮ್ಮ ಭವಿಷ್ಯ ನಿರ್ಧಾರವಾಗಲಿದೆ.